Pas vrasjes së minoritarit grek, Kostandin Kacifas, në Gjirokastër më 28 shtator, situata mes Shqipërisë dhe Greqisë u tensionua shumë.
Qytetarët grekë dolën në protestë para Ambasadës shqiptare në shtetin helen, ku edhe dogjën flamurin me shqiponjën dykrenore.
Të rinjtë shqiptarë reaguan për këtë gjest, jo duke ia kthyer në të njëjtën monedhë, por duke bërë të kundërtën.
Në një video të publikuar në “YouTube” nga profili “nestcuni”, shfaqet një djalë i cili qëndron në liqenin e Pogradecit i veshur me një bluzë me simbolin tonë kombëtar, ndërsa në duar mban flamurin grek. Dhe duke na habitur të gjithëve ai bën veprimin e veçantë dhe lan flamurin e shtetin helen në liqen, si një gjest paqeje.
“Flamuri jonë është djegur kohët e fundit në mes të Athinës. Kjo nuk ishte gjë e bukur për ne. Megjithatë ne nuk do bëjmë të njëjtën gjë, përkundrazi, ne do ta lajmë dhe për këtë arsye kemi ardhur tek liqeni i Pogradecit, i cili ka ujin më të pastër në Shqipëri. Këtë do të bëjmë, do të lajmë flamurin tuaj me ujin më të pastër në Shqipëri. Ne jemi dy popuj miq prej mijëra vitesh dhe në kohët më të vështira kemi ndihmuar njëri-tjetrin”, thotë gjatë videos i riu.
Ky regjistrim vjen si një mesazh paqeje, për të mos acaruar situatën mes dy vendeve, por për të qetësuar patriotët. Është një mesazh që duhet të ndjekim dhe për t’u duartrokitur!
Burimi: YouTube
