Tifozët skocezë kanë pushtuar Shqipërinë këto ditë, pasi kanë ardhur për të bërë tifo për skuadrën e tyre kombëtare të futbollit, që po ndeshet aktualisht me Kombëtaren shqiptare në stadiumin “Loro Boriçi” në Shkodër.
Për këtë ndeshje kanë mbërritur në Shqipëri rreth 2 mijë tifozë, të cilët duke përfituar nga vizita janë njohur edhe me kryeqytetin shqiptar.
Dhe pikërisht gjatë një interviste të gazetarit të “Top Channel”, Endi Tufa, një gjest i veçantë po shkrin së qeshuri të gjithë internetin. Teksa gazetari raportonte për ndeshjen Shqipëri-Skoci, një tifoz iu afrua dhe e kapi për qafe për ta puthur.
Gazetari mbeti i habitur për momentin por më pas i afroi faqen, ku tifozi i dhuroi një puthje live në transmetim direkt. Ky gjest na ka lënë të gjithëve pa fjalë, por ka treguar edhe anën e dashur të këtyre tifozëve, të cilët dy ditë më parë kanë përgatitur edhe një dhuratë të veçantë për shqiptarët.
Ata kanë mbledhur një fond prej 5 mijë paundë të cilin do ta dhurojnë për fëmijët me sindromën Down dhe autizëm në vendin tonë.
