Anxhelo Yzeiraj është vetëm 8 vjeç, por ka njohuri të përgjithshme mbi mesataren. Përreth katër vite, Anxhelo ka jetuar në Francë së bashku me familjen, ku mori pjesë edhe në një konkurs ndërkombëtar për inteligjencën. Nga 48 pjesëmarrës, ku më i madhi ishte 18 vjeç, Anxhelo fitoi vendin e parë. Vogëlushi vizitohet një herë në vit nga psikologët, të cilët kanë dalë në përfundimin se ai ka inteligjencë mbi normalen për moshën e tij dhe kujtesë shumë të mirë.
8-vjeçari me njohuri nga fusha të ndryshme si: historia, gjeografia, letërsia, matematika e fizika ishte sot i ftuar në emisionin “Rudina” në Tv Klan bashkë me babain e tij Denis Yzeiraj.
“Unë nuk dua ta mburr djalin tim, por ai është fëmijë shembullor. Ai ka qenë 4 vjeç e gjysmë kur ka marrë pjesë në një konkurs me 48 pjesëmarrës në Francë dhe ka fituar çmimin e parë. Pas konkursit ai ka ngritur flamurin shqiptar në Francë. Edhe drejtori i shkollës në Francë më vinte në shtëpi dhe më thoshte ke një djalë të përkryer. Ai ka qenë 3 vjeç e gjysmë kur vura re se kishte memorie shumë të fortë. Kur i tregoja përralla në të cilat përfshija shtetet dhe kryeqytetet e botës vura re se i mbante mend të gjitha. Pasi jemi kthyer nga Franca kam nisur t’i mësoj historinë e Shqipërisë dhe çdo gjë që i kisha thënë unë ai m’i tregonte mbrapsht”, tha babai i Anxhelos.
Moderatorja e emisonit zhvilloi edhe një pyetsor me Anxhelon, i cili nuk gaboi asnjë përgjigje. Gjatë intervistës, ai rrëfeu se ka dëshirë që të bëhet inxhinier dhe gjeograf.
“Këtë vit unë kam ndryshuar shkollën dhe mësuesja ende nuk e di sa shumë gjëra di, por do ta mësojë. Unë kur të rritem dua të bëhem inxhinier dhe gjeograf sepse ato ndërtojnë gradaçela. Matematika është lënda ime e preferuar në shkollë”, tha Anxhelo.
