Gjendja shëndetësore e Princeshës së Kurorës së Norvegjisë, Mette-Marit, ka hyrë në një fazë delikate, duke e afruar gjithnjë e më shumë drejt një transplanti mushkërish, si pasojë e përkeqësimit të fibrozës pulmonare nga e cila ajo vuan prej vitesh.
Sipas raportimeve të BBC, ekzaminimet mjekësore të kryera gjatë vjeshtës kanë treguar një agravim të dukshëm të sëmundjes, e cila ndikon drejtpërdrejt në frymëmarrje dhe në furnizimin e organizmit me oksigjen. Mjekët e Spitalit Universitar të Oslos konfirmojnë se gjendja po shkon drejt një pike ku transplantimi i mushkërive mund të bëhet i pashmangshëm.
Në një njoftim zyrtar, Pallati Mbretëror i Norvegjisë bëri të ditur se princesha ka nevojë gjithnjë e më shumë për pushim, aktivitete fizike të kontrolluara dhe një ritëm më të qetë jete. Për këtë arsye, angazhimet e saj zyrtare do të përshtaten sipas gjendjes shëndetësore, ndonëse Mette-Marit ka shprehur dëshirën për të vazhduar detyrat e saj publike sa herë që gjendja ia lejon.
Edhe Princi i Kurorës, Haakon, ka folur për gjendjen e bashkëshortes, duke theksuar se ajo ndihet më mirë gjatë pushimit, por përballet me vështirësi të shtuara në frymëmarrje gjatë aktivitetit fizik, ka më pak energji dhe infektohet më shpesh.
Mette-Marit, 52 vjeçe, u diagnostikua me fibrozë pulmonare në vitin 2018, një sëmundje kronike dhe progresive. Mjekët kanë sqaruar se transplantimi i mushkërive konsiderohet gjithmonë si zgjidhja e fundit, për shkak të rreziqeve të larta që mbart një ndërhyrje e tillë, dhe aplikohet vetëm në rastet më të rënda.
