Tim Friede, është një ekspert autodidakt gjarpërinjsh në Kaliforni i cili për 18 vjet e la veten të ishte ‘pre’ e pickimeve të gjarpërinjve duke fituar imunitet nga disa neurotoksina. Ai i injektoi vetes qindra herë helmin e disa prej gjarpërinjve më helmuees të botës si kobrat, mambat dhe gjarpërinjtë me zile si dhe i lejonte ta kafshonin.
Sot, gjaku i tij ka bërë që të krijohet një kundërhelm që mund të mbrojë nga 19 lloje gjarpërinjsh helmues, një provë që ka rezultuar e suksesshme te minjtë, raporton CNN.
Shkencëtarët e kompanisë Centivax, izoluan antitrupat nga gjaku i tij të cilat reagonin me neurotoksinat e 19 llojeve të gjarpërinjve të përfshirë në eksperiment.
Antitrupat u testuan një nga një te minjtë e helmuar me helmin e secilit prej 19 gjarpërinjve duke i lejuar shkencëtarët të kuptonin numrin minimal të elementëve që do të neutralizonin të gjithë helmet. Kokteili i ilaçeve përfshinte tri gjëra: dy antitrupa dhe një ilaç me molekula të vogla, varespladib që përmban një enzimë të pranishme në 95% të kafshimeve nga gjarpërinjtë. Ilaçi po testohet te njerëzit si kurë më vete.
Antitrupi i parë, LNX-D09 i mbronte minjtë nga një dozë vdekjeprurëse e helmit të 6 gjarpërinjve. Shtimi i varespladib siguronte mbrojtje edhe nga 3 lloje të tjera. Në fund, shkencëtarët shtuan antitrupin tjetër nga gjaku i Friede, SNX-B03 që siguron mbrojtje nga 19 gjarpërinj. Kundërhelmi i mbronte minjtë 100% nga helmi i 13 llojeve gjarpërinjsh dhe 20-40% nga 6 të tjerë.
Ilaçi s’është testuar te njerëzit,por duhet të miratohet për përdorim klinik. Theksohet se ilaçi funksionon kryesisht në klasën e gjarpërinjve që quhet elapide. Në të nuk përfshihen viperidët, një grup tjetër i madh gjarpërinjsh helmues që përfshin gjarpërinjtë me zile dhe disa lloje nepërkash.
Megjithatë, ekipi po punon për të parë nëse antitrupat në gjakun e Friede apo agjentë të tjerë mund të realizojnë mbrojtjen nga familja e viperideve. Gjithashtu, ata duan të nisin kërkimet në terren duke filluar nga Australia që ka vetëm gjarpërinj elapidë dhe veterinerët mund ta përdorin kundërhelmin te qentë e pickuar prej zvarranikëve helmues.
