Moderatorja e njohur shqiptare, Gerta Heta ka rrëfyer një histori të dhimbshme në emisionin “Oktapod”. Ajo rrëfeu se si i dashuri i saj ushtronte dhunë fizike mbi të dhe e kërcënonte. Për 6 muaj rresht ishte dhunuar sistematikisht, por kishte frikë t’u thoshte familjarëve sepse e kërcënonte se do t’iu bënte keq atyre.
“Lidhja ime e parë ka qenë me një person të dhunshëm dhe vuaja nga dhuna fizike. Haja dru çdo ditë. Isha 18 vjeç dhe nuk guxoja t’i thoja njeriu se më bënte presion. ‘Do t’i thyej këmbët vëllait tënd’, më thoshtë. Unë kisha frikë t’u tregoja prindërve.
Pas 6 muajsh dhune sistematike iu thashë prindërve dhe arrita të largohesha nga ai. Në plazh prindërit më panë me njolla të zeza në trup dhe aty u detyrova dhe fola. Iu thashë prindërve që kisha nevojë për ndihmën e tyre, që të mos më linin vetëm”, rrëfeu Gerta.
Moderatorja tha se falë ndihmës së prindërve dhe të policisë arriti të shpëtonte prej tij.
“Prindërit m’u gjetën jashtë mase afër. 1 vit të tërë ata më sillnin, më prisnin në shkollë. Ai më përndiqte, vinte tek shkolla, shkruante tek muret ‘Gerta të dua, më fal’.
Ai ishte 5 vite më i madh se unë. U largua vetëm kur i çova policinë në shtëpi”, tregoi Gera.
