Asgjë nuk është e parashikueshme për një gazetar terreni. Ndërsa të gjithë ishin fokusar te gjesti i administratores së firmës private, ne na bëri përshtypje reagimi i gazetarit Genci Agjellari, i emisionit “Stop” në TV Klan.
Nën shoqërinë e operatorit, ndodhej për të investiguar, situatën e hedhjes së mbetjeve spitalore nga kompania e dezinfektimit dhe riciklimit të mbetjeve të rrezikshme “Euroteam”, por fjalët kanë qenë të tepërta për administratoren Mirela Topulli, që e gjendur ngushtë përpara pyetjeve të gazetarit e ka dhunuar këtë të fundit, ndërkohë që kamera vazhdonte të xhironte.
Për asnjë moment ai nuk ngriti dorën ndaj administratores, duke ruajtur gjakftohtësinë:
“Shiko çfarë bën”, i drejtohet ai kamerës, ndërkohë që administratorja vazhdonte ta qëllonte.
Si të mos mjaftonte kjo, ajo shprehet duke e kërcënuar:
“E di ç’të bëj unë ty mor qen”.
Pas investigimit të rrugës, që bënin mbetjet e rrezikshme spitalore dhe derdhjes së tyre në brigjet e lumit Erzen, Inspektorati i Mjedisit, grupi i policisë dhe OPGJ shkuan në vendngjarje për hetimin e skandalit.
Por edhe pas njoftimit të autoriteteve, mbetjet e rrezikshme “u zhdukën” gradualisht nga vendi, ku u hodhën javën e kaluar. Gazetari i “Stop” kërkoi shpjegim për krimin mjedisor, edhe nga aksionerja dhe administratorja e firmës “Euroteam”, Mirela Topulli, që ushtroi dhunë mbi gazetarin, duke e gjuajtur vazhdimisht në fytyrë.
