Nëse je në vitin e fundit të shkollës së mesme, jemi të sigurt se më shumë sesa provimet, një tjetër çështje të shqetëson së fundmi: Mbrëmja e Maturës. Që në vitet e para të adoleshencës, vajzat ëndërrojnë për këtë natë dhe sa më shumë afrohet, aq më i madh bëhet stresi në lidhje me mënyrën sesi do të vishen apo grimohen mbrëmjen e madhe dhe me të drejtë! Në ditët tona ka aq shumë zgjedhje dhe nëse shton këtu dëshirën për t’u dukur sa më e veçantë, gjërat ndërlikohen edhe më shumë. Megjithatë, mund të ndalosh së u shqetësuari sepse me trendet e mëposhtme të përzgjedhura nga ne të “Iconstyle.al”, është e sigurt që do të dukesh si një yll Hollywood-i, duke qenë se trendet në fjalë janë frymëzuar pikërisht nga tapeti i kuq i Oscar-ve.
1.Guxo me të bardhën
Shqetësohesh se do të të thonë se dukesh si nuse? Por fundja a nuk duken yll nuset?! Vetëm paraprakisht, sigurohu të kesh marrë pak ngjyrë dhe të gjithë sytë do të jeni mbi ty!
2.Trego linjat
Nëse je krenare për linjat e tua, mos ngurro t’i shfaqësh ato! Zgjidh një fustan minimalist që përqafon format trupore dhe nëse ata që gjen nëpër dyqane nuk ta mbushin syrin, një rrobaqepëse e mirë me siguri do të të nderojë.
3.Një statujë e artë
Mendon se xixat dhe teminat janë jashtë mode? Hidhi një sy Jennifer Lawrence… Eh, e dinim që do ndryshoje mendim!
4.Rikthim në të shkuarën
Nëse do që kryefjala e pamjes tënde të jetë stili, atëherë rikthehu në vitet ’20 dhe frymëzohu nga balerinat e “charleston-it” me thekët ikonike, teminat dhe gurët e shndritshëm.
5.Shndërrohu në perëndeshë
Frymëzohu nga perëndeshat greke me fustanet që derdhen në trup. Nëse e guximshme mjaftushëm, një e çarë rrëzë kofshës do të të bëjë të dukesh përvëluese.
6.Shkurt e më shkurt
Nëse fustanet e gjatë nuk bëjnë për ty, një fustan i shkurtër i zi që ekspozon këmbët dhe thekson belin do të jetë perfekt. Por që të mos dukesh sikur thjesht ke dalë për të pirë një gotë me shoqërinë, frymëzohu nga Kendall Jenner dhe mëngët e saj voluminoze.
7.Fruda lozonjare
Frudat dhe palat e mëdha edhe këtë sezon janë kryefjala e modës, ndaj nuk kanë si të mungojnë edhe në veshjet e mbrëmjes.
8.E çara “alla Angelina”
E çara rrëzë kofshës përfundimisht nuk do të dalë kurrë jashtë mode dhe detaje dekoruese si ky në fustanin e Jenna Dewan do të sjellin vëmendjen e të gjithëve tek këmbët e tua të bukura.
9.Ke guxim?
Nëse ke aq vetbesim sa mund të hapësh një dyqan për ta shitur, atëherë guxo me fustanin “e zhveshur”. Zgjidh diçka të shndrritshme e transparente në ngjyrë të artë dhe për të shmangur ndonjë incident të pakëndshëm, investo në një body cilësor. Do të dukesh si një diva!
9.E nxehtë me të kuqe
E kuqja tërbon edhe demin apo jo?! Atëherë përse të mos i mahnisësh me një fustan të kuq si ky i Rita Orës me një prerje të dekoltesë që do t’i lërë të gjithë pa fjalë?!
Burimi: Iconstyle.al
