Kryetari i Forumit Eurosocialist të Shqipërisë, Eljo Hysko ka marrë mandatin e deputetit.
Për të gjithë ju që nuk e njihni, Eljo është vëllai i moderatorit Turjan Hysko dhe prej kohësh është angazhuar në radhët e Partisë Socialiste.
Duke qenë se sot Eljo do të betohet në Kuvend së bashku me tre deputetë të rinj të Partisë Socialiste, ai ka bërë sot përgatitjet e nevojshme për këtë ditë të veçantë!
Ka qenë Orinda Huta ajo që e ka ndihmuar kunatin të zgjedhë kostumin e tij ndërsa këtë moment e ka përcjellë në Instagram, ku shkruan:
“Rruga jote qoftë plot dritë dhe plot bekime! Të dua Eljo Hysko!”.
Urimi nuk ka munguar as nga vëllai Turi, i cili tashmë ndihet shumë krenar për vëllain e tij të vogël.
Pas lënies së mandatit nga 4 deputetë, të cilët do të garojnë për kryetar bashkie në zgjedhjet lokale të 30 qershorit, mandatet e tyre i marrin emrat që pasonin listat e Partisë Socialiste në qytetet përkatëse. Eljo Hysko ka marrë mandatin e Rakip Sulit që kandidon për Bashkinë e Kamzës.
