Një ngjarje e rëndë u shënua mbrëmjen e së hënës në ambientet e Gardës së Republikës, për t’u bërë publike për median vetëm mëngjesin e sotëm.
Punonjësi i Gardës, 30-vjeçari Ariol Mance u gjet i pajetë rreth orës 23:00 të ditës së djeshme.
Sipas Ministrisë së Brendshme, dyshohet se gardisti vrau veten me armën e shërbimit. Fill pas ngjarjes së rëndë, grupi hetimor administroi dhe sekuestroi provat që forcojnë dyshimin se akti i rëndë është kryer në kushtet e tronditjes psikike.
“BalkanWeb” zbulon mesazhin që gardisti i dërgoi babait të tij, pak se të ndërmerrte aktin e rëndë të vetëvrasjes.
“U ndava nga e dashura, ndaj po ndahem edhe nga kjo jetë”, shkruhej në mesazhin që 30-vjeçari nga Përmeti i dërgoi të atit.
Kujtojmë se rreth 3 muaj më parë (më 30 qershor) në ambientet e Gardës së Republikës, u gjet i vrarë me plumb në kokë brenda një makine, Shkëlzen Qordja shoferi i ministrit të Brendshëm, Fatmir Xhafaj. Pas hetimeve, rezultoi se ai kishte vrarë veten me armën e shërbimit.
Ndërkohë, të tjera detaje pritet të hedhin dritë mbi ngjarjen që ndodhi ditën e djeshme, më 1 tetor.
Burimi: BalkanWeb
