Erdhi më në fund dita e Met Gala 2019!
Galaja më e rëndësishme në botën e modës është jo vetëm një event shumë glamuroz, por mbi të gjitha super ekskluziv. Kjo, do të thotë se jo çdokush mund të shkojë atje. Përveç biletës që kushton 30 mijë sa për të hyrë dhe 275 mijë në zonën VIP me shishe, pjesa e privilegjuar që shkon atje pa paguar, kërkon miratimin e Anna Wintour, kryeredaktore e “Vogue” dhe mikpritëse e MET Galasë që prej vitit 1995, përveç dy mungesave në ’96-ën dhe ’98-ën.
Për ndonjë arsye, Bebe Rexha përshembull nuk do të jetë tek MET Gala 2019. Kjo, ndoshta mund të ketë të bëjë me faktin se ky është një event mode dhe le të themi se këngëtarja shqiptare s’i ka fort të mira marrëdhëniet me stilistët. Kujtojmë se pak përpara çmimeve Grammy 2019, kantautorja u dedikoi një fjalim dizajnuesve që nuk deshën ta vishnin për ceremoninë, sepse nuk është në masën small.
Nga ana tjetër, Rita Ora do të jetë e pranishme në galanë e këtij viti, ashtu si në tre vitet e kaluara.
Këngëtarja ndau në Instagram momentet e parapërgatitjeve vanitoze, me shampanjë me emrin e saj dhe këtë video ku kërcen nudo vetëm me një pellush.
Ajo që e ka premierë, është Dua Lipa.
Me maskat qetësuese poshtë syve, Dua zbuloi pakëz nga përgatitjet për Met Galanë e saj. Duhet të jetë emocionuese.
Por, çfarë do të veshin vajzat tona në Met Gala?
Edhe pse s’kemi si ta dimë, diçka që dihet çdo vit përpara MET Galasë është tema që do të kenë veshjet, që në fakt lidhet me temën që ka ekspozita në brendësi të muzeut.
Vitin e kaluar, tema e veshjeve ishte frymëzimi nga motivet e veshjeve fetare, prandaj edhe Rihanna vendosi të shfaqej si Papa, por seksi.
Kurse këtë vit, tema bazohet tek një ese e autorrs Susan Sontag, të quajtur “Camp”. Kjo fjalë përfaqëson diçka false dhe të ekzagjeruar, kështu që presim veshje shumë ekstravagante dhe makeup që do t’i bëjë gratë dhe burrat të duken artificialë në tapetin e kuq.
