Aktori italian Gabriel Garko do të vijë në Shqipëri për të xhiruar filmin e tij më të ri, “Lazarat Burning”. Filmi, një thriller aksion me regji të William Kaufmann dhe skenar të Pete J. Gibbons do të përfshijë historinë e Lazaratit famëkeq.
Filmi bazohet në ngjarje të vërteta që marrin jetë në zemër të Shqipërisë, gjetjen dhe asgjësimin e lëndëve narkotike, krimit dhe prostitucionit, por nuk do të mungojë edhe trajtimi i jetëve njerëzore.
Gabriel Garko, do të luajë rolin e Bujarit, i cili ka humbur të atin në një konflikt të lindur nga pazaret e drogës, kurse nënën në një fushë hashashi. Në një konferencë për shtyp të mbajtur sot, aktori i njohur italian tregoi se ka një lidhje emocionale me vendin tonë:
“Shqipëria është shumë afër Italisë, por në një kuptim edhe shumë larg. Nuk e njihja shumë, por me aq sa e kam parë deri më tani, po më josh tej mase”.
Ndërsa producenti ekzekutiv dhe themeluesi i ‘Mercury Films’, Issa Zaroui, nënvizoi se Lazarati është kthyer në një markë: “Edhe nëse je në mes të Hollandës, mund të dëgjosh për të”.
Përveç aktorëve të huaj, në filmin “Lazarat Burning” marrin pjesë edhe emra të tjerë të njohur aktorësh shqiptarë si: Blerim Destani, Albana Osmani, Ermal Mamaqi dhe Jonida Vokshi.
