Disa javë më parë bëri xhiron e rrjetit një video ku shfaqej Pëllumb Pipero gjatë një dreke me miqtë e tij duke bërë dolli teksa i vedos kapak në fund ku thyen gotën.(traditë shqiptarshe)
Ajo që revoltoi qytetarët ishte fakti se si një person, i cili u kthye në imazhin e luftës kundër Covid-19 në vendin tonë me këshillat e tij, vetë nuk i zbaton ato që thotë.
Aso kohe nëpërmjet një reagimi në Facebook, infeksionisti tha se ajo është bërë muaj më parë, në një lokal në Velipojë dhe në kushte të tjera, edhe pse me Covid.
Sipas tij, “dreka ishte mes miqsh, të cilëve duke i respektuar ju kam besuar jo vetëm fytyren por edhe jetën”.
Po ashtu, edhe pak ditë më parë teksa ishte në Skrapar, ku mori çmimin “Qytetar Nderi” nga Bashkia shkaktoi një reagim të fortë në rrjete sociale pasi ai u shfaq duke përqafuar qytetarë pa respektuar masat. Pipero u prit me buqeta me lule nga miqtë, kolegët, familjarët e tij dhe nga pamjet e publikuara nuk munguan përqafimet dhe puthjet me qytetarët.
Në një intervistë në Report Tv ditën e sotme, Pipero ka kërkuar falje për këtë episod, duke thënë se ishte rrëmbyer nga emocionet.
“Ishte një gabim që duhej evituar. Duhet të ishim treguar më të kujdesshëm. Emocionet ishin shumë të mëdha. Është një shembull që nuk duhej të ishte ndjekur. Një ndjesë publike për atë që ndodhi. Duhej ta kishim shmangur” – tha Pipero.
