Pasditen e sotme legjenda e futbollit, Pele, ka ndërruar jetë teksa ishte shtruar në spital.
Përmes një mesazhi në faqen zyrtare në Twitter të Pelesë, u njoftua dhe ndarja nga jeta e ikonës së futbollit.
Në postimin ku njoftohet vdekja e tij i përcillet një mesazh qytetarëve që të dhurojnë sa më shumë dashuri.
“Frymëzimi dhe dashuria shënuan rrugëtimin e mbretit Pelé, i cili u nda nga jeta sot në mënyrë paqësore. Dashuri, dashuri dhe dashuri, përgjithmonë”, ishin fjalët e fundit në llogarinë e Peles në Twitter.
Kujtojmë se Pele ndërroi jetën në moshën moshën 82-vjeçare, teksa vuante nga një sëmundje e rëndë dhe ishte shtruar në spital prej nëntorit.
Pele është konsideruar “mbreti brazilian i futbollit”. Ai shënoi rekord duke fituar 3 kupa Bote me kombëtaren braziliane në vitet 1958, 1962 dhe 1970.
Në karrierën e tij nga viti 1957 në 1977, Pele ka shënuar 757 gola në 831 ndeshje. Këto janë shifra zyrtare të regjistruara, por ekipi i tij, Santos si dhe shumë burime të tjera thonë se Pele ka shënuar mbi 1200 gola.
Futbollisti brazilian Neymar ka shprehur ngushëllimet për ndarjen nga jeta të legjendës Pele. Me anë të një postimi në Facebook, ai ka ndarë disa foto me atë që e quan “mbret”, për të cilin shkruan se ka ndryshuar krejtësisht futbollin.
