Kosova ka anuluar përkohësisht të gjitha fluturimet që vijnë nga Italia e Veriut.
Ministri i Infrastrukturës dhe Ambientit në Kosovës, Lumir Abdixhiku bëri me dije se Instituti Kombëtar i Shëndetësisë ka rekomanduar ndalimin e këtyre fluturimeve.
“Sot, në ora 12:40 kemi pranuar rekomandim emergjent nga Instituti Kombëtar i Shëndetësisë për anulimin e të gjitha fluturimeve që vijnë nga zonat epidemike të Italisë së Veriut – si refleksion i karantinës së vendosur nga qeveria italiane në betejën kundër Koronavirusit. Si rrjedhojë, kam kërkuar anulimin e përkohshëm të të gjitha fluturimeve që vijnë nga kjo zonë epidemike e cilësuar si zonë me risk tē lartë. Fluturimet janë ndërprerë”, ka shkruar Abdixhiku.
Më tej kreu i ministrisë së Infrastrukturës shton se është në kontakt me institucionet e tjera për të pasur një koordinim sa më të mirë.
“Ndjejmë keqardhje për masat e marra – por në situatën e tanishme nuk kemi alternativë. Jam në kontakt të ngushtë me Ministrin e Shëndetësisë Vitia dhe me Ministrin e Punëve të Jashtme Konjufca për të koordinuar kontrollin në Aeroport dhe asistencën eventuale ndaj udhëtarëve në zonat e rrezikshmërisë së lartë”, përfundon Abdixhiku.
Italia sot vendosi në karantinë rreth 16 milionë banorë për shkak të Koronavirusit. Lombardia dhe 14 provinca të tjera janë izoluar dhe mund të dalësh dhe të hysh nga to, vetëm për arsye shumë emergjente.
