Jeta e gjyqtares Fildes Hafizi u pre dje në mes nga ish-bashkëshorti i saj. Frika e 39-vjeçares se do t’i vinte fundi nisi dy vite më parë, kur mori një kërcënim nga personi që dje i mori jetën në mes të ditës dhe në mes të rrugës.
Ngjarja tragjike ndodhi mesditën e së enjtes në zonën e Xhamllikut. Gjyqtarja e Gjykatës Administrative në Shkodër ishte vëzhguar pa dijeninë e saj prej disa orësh nga ish-bashkëshorti Fadil Kasemi, i cili priti sa të dilte nga shtëpia për ta qëlluar me dy plumba, teksa ajo ndodhej në makinë.
Dëshmitarët e shumtë në vendin e ngjarjes tregojnë se Kasemi nuk tentoi të largohej, por u vetëdorëzua në polici.
Pas divorcit, gjyqtarja kishte marrë urdhër-mbrojtje nga gjykata, e megjithatë kjo nuk e ka ndalur atë t’i afrohet.
Kasemi kishte tentuar ta vriste ish-gruan e tij edhe më parë, konkretisht më 20 korrik të vitit 2015 në plazhin e Golemit, ku Hafizi po pushonte së bashku me djalin.
Siç rrëfyen në atë kohë edhe pushuesit që ishin dëshmitarë, pas një konflikti të ashpër, Kasemi e goditi disa herë me grushte në fytyrë ish-gruan, e më pas nxori pistoletën nga një çantë që mbante në dorë duke kërcënuar se do ta vriste.
Ishte ndërhyrja e pushuesve dhe e djalit të vogël, i cili i është lutur babait që të mos ta vriste, që i shpëtuan jetën gjyqtares.
Fadil Kasemi kishte 8 muaj që kishte dalë nga burgu pasi ishte dënuar me 4 vite burgim për veprat penale ‘Dhunë në familje’ dhe “Armëmbajtje pa leje’, por ai bëri vetëm 16 muaj burg pasi përfitoi nga amnistia.
Përgjatë gjithë këtyre viteve gjyqtarja ka jetuar me frikën se ish-bashkëshorti do ta vriste.
Ajo kishte kërkuar ndihmën e gjykatës, policisë madje i kishte shkruar një letër ambasadorit të SHBA-së ku i kërkonte ndihmë pasi nuk i kishte mbetur asnjë tjetër që t’i drejtohej, e megjithatë këto nuk kanë mjaftuar për të parandaluar atë që gjyqtarja i druhej.
Ish-bashkëshorti i saj e vrau dje në mesin e ditës në një nga zonat më të populluara në Tiranë me dy plumba duke e lënë të vdekur në vend.
