Prej mëngjesit të sotëm, kantautori i njohur shqiptar i viteve 1980- 1990, Françesk Radi është shtruar në reanimacionin e QSUT-së.
Ora News raporton se këngëtari ka pësuar hemoragji cerebrale dhe rrezikon jetën.
Bashkëshortja e tij, Tefta Radi u ka bërë një apel autoriteteve shtetërore, për të mundësuar kurimin jashtë vendit.
“Gjendja e tij është shumë e rëndë. Nëse autoritetet kanë mundësit për ta dërguar jashtë për një mjekim më të specializuar ju lutem ta bëjnë”, tha mes lotësh Tefta Radi.
Këngëtari mbërriti në urgjencë rreth orës 03:30, i shoqëruar nga bashkëshortja Tefta Radi, mbesa Rozana Radi dhe disa persona të tjerë.
Ai mbetet një nga ikonat e muzikës shqiptare dhe do të mbahet mend për disa nga këngët e tij të njohura si “Adresa”, “Biçikleta”, “Humba pranverën”.
