Gjykata Ndërkombëtare e Arbitrazhit në Uashington ka vendosur të favor të Francesco Bechetti-t për të hequr pezullimin e ekzekutimit të gjobës 110 milionë euro kundër Shqipërisë.
Vendimi i pezullimit ishte marrë me 27 gusht të vitit 2019. Në 24 prill, Gjykata Ndërkombëtare e Arbitrazhit për konfliktet e investimeve, e njohur ndryshe si ICSID, e gjobiti Shqipërinë me 110 milionë euro për konfliktin me biznesmenin italian, Francesco Beccheti.
Në datën 27 gusht u pranua kërkesa e Avokaturës së Shtetit për anulimin e gjobës dhe menjëherë Sekretari i Përgjithshëm i kësaj Gjykate njoftoi të dy palët e përfshira në konflikt.
Por më 23 mars e njëjta gjykatë e hoqi pezullimin, duke lënë në fuqi gjobën e madhe për shtetin shqiptar.
Konflikti nisi pasi Shqipëria prishi kontratën koncesionare me kompaninë e italianit Francesko Becchetti për ndërtimin e hidrocentralit në lumin Vjosë.
Kontrata ishte nënshkruar shumë vite më parë por për shkak të zvarritjeve, ajo u prish në mënyrë të njëanshme.
/Top Channel
