Një ngjarje e pazakontë ka ndodhur të dielën në mëngjes në qytetin Aurillac të Francës, ku një sulm i papritur bletësh ka shkaktuar panik dhe ka lënë të plagosur 24 persona, tre prej të cilëve ndodhen në gjendje të rëndë.
Sipas autoriteteve lokale, incidenti zgjati rreth 30 minuta dhe ndodhi pranë një hoteli në qendër të qytetit, ku kalimtarë të shumtë u goditën në mënyrë të përsëritur nga thumbimet. Zjarrfikësit dhe ndihma e shpejtë ndërhynë menjëherë, ndërsa policia krijoi perimetër sigurie për të kontrolluar situatën.
Një nga të lënduarit, një burrë 78-vjeçar, pësoi arrest kardiak, por u rikuperua falë ndërhyrjes së menjëhershme mjekësore. Gjendja e tre të plagosurve më të rëndë është raportuar se po përmirësohet.
Dyshohet se sulmi u shkaktua pasi disa grerëza shqetësuan një kosherë bletësh që ndodhej prej vitesh në tarracën e hotelit. Kosherja është hequr tashmë nga një bletërritës dhe është zhvendosur jashtë zonës së banuar.
