Kanë nisur sot homazhet për majorin Klodian Tanushi, i cili u nda nga jeta në krye të detyrës, gjatë misionit ushtarak në Letoni.
Homazhet po mbahen aktualisht në Muzeun Historik Kombëtar në Tiranë, ku një numër i madh ushtarakësh, të afërmish dhe figura politike janë të pranishëm.
Pranë arkivolit të tij qëndrojnë edhe familjarët e tij së bashku me tre fëmijët e vegjël që majori la pas.
Djali i tij i madh 14-vjeçar, djali i dytë 11-vjeçar dhe vajza më e vogël 1-vjeçare që qëndron në krahët e nënës teksa kjo e fundit derdh lot mbi trupin e pajetë të bashkëshortit.
Edhe pse të vegjël në moshë, dy djemtë e majorit e kanë kuptuar se kjo do të jetë hera e fundit që qëndrojnë pranë tij teksa puthin arkivolin për t’i dhënë lamtumirën përgjithmonë.
Veç miqve dhe të afërmve, homazhe në nder të majorit zhvilluan edhe kolegë të tij ushtarakë shqiptarë dhe të huaj, ish-ministrja e mbrojtjes Mimi Kodheli, ish-deputeti demokrat Edi Paloka, Presidenti Ilir Meta.
Pas homazheve, major Tanushit do t’i jepet lamtumira e fundit në Varrezat e Dëshmorëve në Tiranë, ku do të prehet përjetësisht.
