Nën diellin përvëlues, më shumë se një milion pelegrinë myslimanë filluan pelegrinazhin e haxhit në Mekë, ndërsa autoritetet u përpoqën të shmangnin një përsëritje të tragjedisë së vitit 2024 kur të paktën 1,300 njerëz vdiqën në temperatura ekstreme.
Pelegrinët, të cilët janë mbledhur në qytetin më të shenjtë të Islamit, ku temperaturat arritën 42 gradë Celsius atë ditë, filluan ritualin e parë të haxhit, rrotullimin rreth Qabesë, shkëmbit të zi të shenjtë brenda Xhamisë së Madhe, drejt të cilit myslimanët në mbarë botën kthehen kur luten.
Shumica mbërritën vonë natën në Mina, një luginë disa kilometra larg Mekës dhe e rrethuar nga male shkëmbore.
Pelegrinët, gati 1.5 milion sipas shifrave zyrtare, do ta kalojnë natën në tenda me ajër të kondicionuar në Mina dhe të enjten do të shkojnë në malin Arafat, një kodër ku Profeti Muhamed mbajti predikimin e tij të lamtumirës.
Autoritetet kanë marrë masa për të shmangur një tragjedi si ajo e vitit të kaluar, kur 1,300 besimtarë vdiqën në një valë ekstreme të të nxehtit, ndërsa temperaturat arritën në 51.8 gradë Celsius.
Pelegrinazhi, një nga tubimet më të mëdha fetare në botë, është një nga “pesë shtyllat” e Islamit. Të gjithë myslimanët janë të detyruar ta kryejnë atë të paktën një herë në jetën e tyre, nëse kanë mundësi.
