Emrat e tyre janë sërish në qendër të vëmendjes. Këngëtarja e njohur botërore Katy Perry dhe ish-kryeministri kanadez Justin Trudeau po përfliten në mediat rozë për një shtatzëni të mundshme.
Gjithçka nisi pas disa fotografive të fundit ku Perry u shfaq me një fustan të bardhë të lirshëm gjatë një daljeje pranë Montecito-s, në Kaliforni. Pamjet u shpërndanë me shpejtësi në rrjetet sociale, duke nxitur komente dhe aludime se artistja mund të jetë në pritje të ëmbël.
Megjithatë, burime të sigurta të kontaktuara nga media amerikane kanë hedhur poshtë këto pretendime. Sipas tyre, Perry nuk është shtatzënë dhe aktualisht nuk ka asnjë konfirmim apo provë që të mbështesë lajmet që po qarkullojnë online.
Një burim i afërt me çiftin ka deklaruar për “Daily Mail” se marrëdhënia mes tyre po ecën mirë dhe se ata po shijojnë një periudhë të qetë, por pa plane konkrete për martesë apo për zgjerim të familjes në këtë moment. “Janë në fazën e muajit të mjaltit”, citohet të ketë thënë burimi, duke lënë të kuptohet se lidhja është ende në një etapë të hershme dhe spontane.
Aktualisht, Katy Perry, 41 vjeçe, është e përqendruar në angazhimet e saj profesionale dhe turneun muzikor, ndërsa vazhdon të jetë një nënë e përkushtuar për vajzën e saj, Daisy Dove, nga lidhja me aktorin Orlando Bloom.
Nga ana tjetër, Justin Trudeau, 54 vjeç, është baba i tre fëmijëve nga martesa e tij me Sophie Grégoire Trudeau. Çifti njoftoi divorcin në vitin 2023, pas shumë vitesh martesë.
Edhe pse spekulimet për një shtatzëni duket se nuk qëndrojnë, vëmendja ndaj çiftit mbetet e lartë. Çdo dalje e tyre publike analizohet në detaj nga fansat dhe mediat, duke i mbajtur vazhdimisht në qendër të diskutimeve.
