Efektivja 24-vjeçare, Ina Nuka, e cila humbi dy gishtat pasi u plagos me kapsollë në protestën e 22 nëntorit të banorëve të Astirit para parlamentit, ndodhet ende në spitalin e Ankarasë.
“Opinion.al” njofton sot se Ina ka kryer deri më tani dy operacione që kanë rezultuar me sukses por operacionin më të vështirë e ka javën që vjen.
“Pritet që të kryhet një ndërhyrje për të zëvendësuar gishtin e madh”, tha burimi.
Pranë polices së plagosur në spitalin turk qëndron nëna e saj. Ndërkohë, hetimet janë duke vazhduar, ndërsa avokatet mohojnë të ketë qenë 18-vjeçari Daniel Dobra, personi që hodhi kapsollën drejt polices.
Pak javë më parë, ai i kërkoi falje publike efektives Ina Nuka. Dobra u shpreh se nuk ka qenë aspak qëllimi i tij të lëndonte efektiven dhe se është dhunuar nga efektivët kur është shoqëruar.
