Ditën e sotme në orën 19:00, ashtu siç ishte lajmëruar dhe pritej me padurim, kryeministri Edi Rama doli në një lidhje dirkete në Facebook për të njoftuar më në fund masat e shumëpritura për të përballuar një krizë të mundshme ekonomike që emergjenca koronavirus mund të sjellë në vendin tonë.
Në planin e tij me 7 pika të konsultuar siç u tha, me ekspertë edhe jashtë vendit, Rama renditi:
1. 2.5 mld lekë për Ministrinë e Shëndetësisë për vijën e zjarrit dhe pajisje e mbështetje për personelin mjekësor
2. 10 mld lekë për kompanitë me vështirësi objektive për të paguar pagat e punonjësve
3. 6.5 miliardë lekë për shtresat në nevojë dhe për biznesin e vogël
4. 2 miliardë lekë në dispozicion të Ministrisë së Mbrojtjes për operacionet humanitare
5. 1 miliardë lekë për Këshillin e Ministrave pë raste emergjence.
6. Fshirja e kamatëvonesave për debitorët aktivë të energjisë familjarë apo biznes i vogël prej të cilit do përfitojnë 211024 abonentë
7. Riskedulimi i tatimfitimit për biznesin nga fasha 20 deri 120 mijë dollarë xhiro.
Gjasat janë që shumëkush që është i interesuar dhe i prekur drjetpërdrejt nga kufizimet e reja, qoftë ky individ apo biznes, e ka marrë këtë lajmërim, e ka lexuar e stërlexuar dhe s’ka kuptuar asgjë.
Kjo pasi në 30 minuta fjalim, kryeminsitri Rama në vend që të shpjegonte në mënyrë të detajuar secilën prej këtyre pikave dhe format se si do të shpërndahen këto miliarda lekë, i kushtoi më shumë se treçerekun e fjalimit të tij metaforave e figurave të tjera letrare për të shpjeguar situatën ku ndodhemi duke ripërsëritur për të disatën herë të gjitha ato që na thotë thuajse përditë.
Pikërisht në momentin kur një popull i tërë, i vënë përpara një ekonomie që tkurret me çdo orë që kalon, priste të dëgjonte masa konkrete, të kuptueshme e të prekshme mbi atë që do të prekë drejtpërdrejt xhepat e tyre, Rama na la po aq të paqartë sa më parë.
Në mbarë botën, krerët e shteteve kanë përkthyer në veprime konkrete lehtësirat fiskale që u ofrohen individëve e bizneseve në këtë prag krize, qofshin këto kredi të buta, bonuse, reduktime në fatura etj., për të cilat kemi shkruar e kemi bërë thirrje për ditë me radhë.
Mirëpo në vendin tonë ku dalëngadalë po hyjmë në javën e dytë të karantinimit, gjobat e masat ndaluese vijojnë të jenë të qarta, ndërsa ndihmat (edhe pse me pikatore) jo!
