Një fluturim nga Berlini drejt Milanos është kthyer në një përvojë traumatike për dhjetëra pasagjerë, pasi avioni u përball me turbulenca të forta që shkaktuan plagosjen e nëntë personave.
Sipas dëshmive të pasagjerëve për mediat gjermane, tronditja ishte aq e dhunshme sa disa prej tyre u përplasën në tavanin e kabinës. “Kam menduar se do të ndahej aeroplani në dysh. Nuk kam qenë kurrë më e frikësuar,” tregoi një pasagjere për gazetën Bild.
Në momentin kur ndodhën turbulencat, disa pasagjerë ishin ngritur nga vendet e tyre, ndërsa një nënë me foshnjën ndodhej në tualet. Disa prej udhëtarëve pretendojnë se nuk u paralajmëruan në kohë për të vendosur rripat e sigurimit.
Për shkak të situatës së krijuar, avioni me 179 pasagjerë dhe 6 anëtarë të ekuipazhit, u detyrua të bënte një ulje emergjente në aeroportin e Memmingen, në Gjermaninë jugore.
Tre persona janë dërguar në spital për trajtim, përfshirë një fëmijë 2-vjeçar me mavijosje, një grua me dëmtime në kokë dhe një pasagjere që ankohej për dhimbje shpine. Ndërkohë, disa të tjerë morën ndihmën e parë në aeroport.
Autoritetet po hetojnë rrethanat e incidentit dhe nëse procedurat e sigurisë u respektuan në mënyrë të duhur.
