Disa ditë më parë u njoftua se Floriana Garo do t’i bashkohej fushatës së Partisë Demokratike. Ndërkohë është mësuar se moderatorja dhe modelja e njohur do të jetë zëdhënëse e fushatës së PD-së.
Ditën e sotme ajo ka bërë daljen e parë zyrtare si zëdhënëse dhe ju është drejtuar të gjithëve me një mesazh. Floriana ka publikuar në Instagramin e saj një foto nga selia, teksa shfaqet para podiumit duke folur.
“Krenare të jem zëdhënëse e fushatës së Partisë Demokratike! Faleminderit për mbështetjen”, ka shkruar Floriana përkrah fotos së saj.
View this post on Instagram
Floriana Garo prej vitesh jeton në Gjenevë të Zvicrës me familjen e saj dhe ka udhëtuar drejt Shqipërisë këto ditë posaçërisht për fushatën. Edhe më herët ajo kishte shprehur rezerva për qeverisjen aktuale duke u shprehur se sistemi është i korruptuar dhe se po përpiqet t’i shfrytëzojë njerëzit në maksimum.
“E shoh një politikë-bërje shumë problematike që e dëmton çdo ditë e më shumë popullin. Një sistem të korruptuar që vetëm do t’i shfrytëzojë njerëzit në maksimum, e me njerëz të lodhur që janë të pafuqishëm për të luftuar për veten dhe të drejtat e tyre. E shoh me një dëshirë të zjarrtë të bëj diçka për ta ndihmuar situatën të ndryshojë. Zvicra më ka bërë të mendoj kështu, pasi bëj krahasimin. Këtu populli ka rëndësi, atje jo”, është shprehur në një intervistë Floriana përpara disa kohësh.
