Kandidati i pavarur për Bashkinë e Tiranës, Florian Binajn, flet për herë të parë për kandidimin e tij të papritur në Top Story në Top Channel
“Nuk kam folur as me Berishën, as me djalin e tij, nuk kam as numrat e tyre. Edhe Lapaj më pyeti o vlla mos është një kamera e fshehtë, se ne do të mbështetim. I thashë të më mbështesni dhe publikisht. Pastaj doli dhe Berisha, përkrahja e tij dhe e gjithë demokratëve, ndryshoi rrjedhën. Nuk do dal në fushatë me të, në asnjë mënyrë. Me asnjë kryetar të asnjë partie opozitare nuk do dal në fushatë. Ata janë mbështetës, nuk janë propozues.
Do krijoj një ekip të specializuar për cdo sektor. Bashkia përdoret si makineri votash për qeverinë, dhe qeveria po ashtu për bashkinë. Ca tepron pastaj mbetet për qytetarët,” tha Binaj.
Pyetja– Fotot me Ramën, Veliaj dhe a je prishur me Adriatik Lapajn ?
Binaj– Me Ramën dola në foto në një organizim FRESSH-i. Në atë periudhë, të gjithë thonin që Rama ishte e vetmja zgjidhje që mund ta shpëtojë vendin. Duke qenë imitues i atij bëra një skeç dhe bëra një lidhje me Ramën, që më dha një mandarinë. Takimin e fundit me Ramën e kam në vitin 2015, që atëherë nuk e kam takuar më dhe as nuk kam folur më. Ne besonim në atë kohë tek ai se nuk e kishim provuar, por u zhgënjeva më pas me atë që ndodhi.
Foton me Veliajn të fundit e kam o në 2014 o në 2015, kur ka qenë ministër, do ju tregoj një histori. Më merr një zonjë më thotë punoj te zyra e pritjes së moshës së tretë dhe organizojmë mbledhim ushqime dhe ata të kanë qef të të takojnë, i thashë patjetër do vi. Takohem përqafohem me pleqtë, dhe duke i shërbyer drekë, dhe shoh një hije që vjen shpejt dhe Lali që thotë: Shpejt një foto, shkrepe, shkrepe, shpejt. Unë nuk e dija që ishte Veliaj aty, ca duhet të bëja unë në atë momente, plus Veliaj në atë kohë nuk ishte ai që është sot, nuk kishte bërë ato që ka bërë sot. Pas kësaj nuk kam qenë më kurrë me të.
