Florjan Binaj ka reaguar pas vendimit të Gjykatës Kushtetuese që dha të drejtë për rikthimin e Erion Veliajt në krye të bashkisë së Tiranës. Ai ka theksuar se, për të dhe për qytetarët e Tiranës, thelbi mbetet i njëjtë: qyteti ka nevojë për ndryshim. Në një postim në rrjetet sociale, Binaj shprehu bindjen e tij se do të kandidojë përsëri për kryebashkiak të Tiranës, kurdo që të mbahen zgjedhjet, duke ruajtur të njëjtin përkushtim dhe energji për të shërbyer me ndershmëri dhe transparencë.
“Për mua, kjo nuk është një garë për pushtet, por një përpjekje për qytetin tonë, për ta bërë atë shtëpinë që duam t’u lëmë fëmijëve tanë,” shkruan Binaj, i cili ishte kandidati i pavarur i mbështetur nga e gjithë opozita. Ai shtoi se mbështetja dhe besimi që ka marrë nga mijëra qytetarë gjatë këtij procesi e kanë bindur se ndryshimi që ata kërkojnë është i mundshëm, dhe që do të vazhdojnë të luftojnë për realizimin e këtij ndryshimi.
Pavarësisht vendimit të Kushtetueses, Binaj tha se qytetarët e Tiranës nuk do ta ndalin përpjekjen për një të ardhme më të mirë dhe se, së bashku, do të arrijnë të realizojnë vizionin e tyre për një qytet më të zhvilluar dhe më të drejtë. Ai ka theksuar gjithashtu se do të vazhdojë të angazhohet për të sjellë ndryshime pozitive për qytetin.
