Vrasja e 21-vjeçares Ariela Murati nga Aldison Belulaj tronditi mbarë opinionin shqiptar. Një ngjarje që është një paralajmërim për shumë vajza dhe gra, të cilat janë të kërcënuara nga meshkujt, që duhet t’i denoncojnë para se të jetë vonë për të mos pasur fatin e keq si Ariela.
Në ceremoninë mortore të Arielës familjarët e Aldisonit nuk u pranuan dhe kjo ngjalli dyshimet për nisjen e një hasmërie mes dy familjeve. Në një intervistë për “News24”, kushëriri i Arielës është shprehur se kjo histori ka marrë fund dhe nuk ka më vend për hasmëri.
“Asnjëherë,jo, jo. Ky muhabet mori fund me ikjen e motrës sonë. Ne nuk duam më humbje njerëzish të dashur. Të gjithë kemi nënë, motra e vëllezër, por duhet t’i respektojmë ata”, është shprehur Saimir Dine.
Ai rrëfeu gjithashtu se presionet e Aldisonit kundrejt kushërirës së tij, i kishte marrë vesh 10 ditë para se të ndodhte ngjarja. Saimiri shprehet se nuk ka mundësi që ata të dy të kenë qenë të lidhur.
“Na ra si bombë kur dëgjuam që Ariela kishte lidhje. Ajo gjithmonë thoshte unë dua të mbaroj shkollën, pastaj të mendoj për jetën. Nuk ka pasur shance të kenë qenë të lidhur. Unë motër vetë nuk kam, e kisha si motër do ma kishte treguar…por kjo jetë qenka ndryshe të keqen nuk e ditke.
Ariela asnjëherë nuk na ishte ankuar për të për shkak të kërcënimeve që i bënte deri në momentin e fundit kur arriti kulimin, vetëm para 10 ditësh para se ta vriste. Nuk ka ligj në botë që t’i thotë ai sot në shekullin e 21-të martohu me mua se dua unë…
Fjalë nuk ka, dhimbja është e madhe si për ne dhe për ata. Ai person që mori një vendim të tillë nuk e di si mund ta ketë bërë”, është shprehur kushëriri i Arielës.
