Aktorja e njohur Monika Lubonja, ka qenë në Mynih gjatë sulmit të mbrëmshëm, ku një shtetas gjerman qëlloi me armë në një qendër tregtare, duke vrarë 9 persona, mes të cilëve 3 me origjinë shqiptare.
Me një status ajo përshkruan situatën e tmerrshme dhe frikën që përjetoi gjatë momentit të sulmit.
“Sot në Muenchen/Deutschland përjetuam një moment shumë të vështirë, përjetuam nga qendra e qytetit, terrorin e panikun e ditës se sotmë. Vrapuam disa km deri sa dolëm nga zona e paralizuar e qytetit. Pamë njerëz të trembur që lëshonin valixhet në mes të rrugës para stacionit të trenit e vraponin me turmën…..kjo që po ndodh është e papranueshme e na bën të mendohemi çfarë i shtyn njerëzit deri në këtë pikë”.
Një i ri shqiptar nga Kosova, gjithashtu ka përjetuar nga afër situatën e sulmit me armë zjarri në Mynih të Gjermanisë. Enis Zulfaj më banim në Mynih ka shkruar në profilin e tij duke përshkruar situatën e vështirë të orëve të pasdites, duke thënë se “kishte parë tmerrin”.
“Para disa orëve për fat të mirë shpëtova nga një sulm terrorist në një qendër tregtare në Mynih të Gjermanisë. Isha vetëm pak metra afër atyre qenieve të frikshme që bërtisnin dhe gjuanin me armë. Aty pash tmerrin. Të gjithë vraponim me sa fuqi kishim për t’u larguar nga objekti. Njerëz të çmendur nga frika, fëmijë e të moshuar duke qarë e duke kërkuar ndihmë, gjithçka e tmerrshme. Qindra automjete policie e shumë grupe të ndihmës mjekësore të cilët na pyesnin nëse kemi nevojë për ndihmë pak minuta pas ngjarjes. Një shtet i përgatitur siç është Gjermania e ka të pamundur t’i parandalojë këto sulme, frikësohem çka do të ndodhë nëse diçka e tillë ndodh në Kosovë?”, shkruan i riu.
