U përcoll sot për në banesën e fundit 35-vjeçari Konstandinos Kacifas, i cili mbeti i vrarë pasi sulmoi policinë shqiptare më 28 tetor.
Kortezhi me mijëra njerëz u nis mesditën e sotme për në varrezat e fshatit Bularat, për ceremoninë mortore të 35-vjeçarit. Fillimisht pati një meshë në kishë dhe më pas varrimi.
I veshur me rroba ushtarake dhe i mbuluar me flamurin grek, i ndjeri u përcoll nga familjarët, banorët e zonës dhe dhjetëra shtetas grekë, të cilët kaluan sot kufirin për të qenë prezentë në ceremoninë mortore.
Deri në shoqërimin e tij në banesën e fundit, arkëmorti qëndroi i hapur ku mund të dallohej fytyra e viktimës e mbuluar nga lulet.
“Vorio Epiri është Greqi, Kacifas jeton, Kacifas drejton”, ishin thirrjet e grekëve.
Një flamur gjigand i Greqisë u shpalos nga pjesëmarrësit, që duke kënduar himnin grek e kaluan arkëmortin e trupin të të ndjerit poshtë tij.
Burimi: BalkanWeb
