Është shkarkuar nga detyra e drejtorit të Shërbimit Parësor Spitalor, Aurel Voda, bashkëshorti i zv/ministres së Brendshme, Rovena Voda, për shkak të fjalorit banal në rrjetet sociale.
Ka qenë ministrja e Shëndetësisë Ogerta Manastirliu ajo e cila ka marrë vendimin për shkarkim, pasi e quajti fjalorin e tij të patolerueshëm.
Manastirliu u shpreh se ai e ka humbur të drejtën të paguhet me taksat e qytetarëve si drejtues në strukturat e sistemit të Ministrisë së Shëndetësisë.
“I patolerueshëm reagimi i dr.Aurel Vodës në profilin e tij në Facebook ndaj disa sulmeve mediatike. Cilatdo qofshin arsyet që e kanë motivuar atë reagim, ai e ka humbur të drejtën të paguhet me taksat e qytetarëve si drejtues në strukturat e sistemit të Ministrisë së Shëndetësisë. Largimi i tij është një mesazh i qartë për të gjithë.
Kush s’i duron dot me qytetari sulmet e çfarëdo lloji, nuk mund të jetë pjesë e sistemit tonë” shkruan ajo.
Aurel Voda kishte komentuar në një lajm të publikuar nga një faqe online, ku kreu i LZHK-së Shehi shprehej se nëse nuk hapen negociatat, PD-ja do të niste protestat.
Ai komentonte “Na plasi ka*i” dhe kjo i ka kushtuar vendin e punës.
/Report tv
