Një komedi e Sky Arts, ku aktori Joseph Fiennes luan rolin e Michael Jackson, nuk do të transmetohet pas një reagimi nga familja e yllit të pop-it.
Fiennes luan rolin e Mbretit të Popit, në një film serial që fillon më 19 janar. Por vajza e Jackson, Paris, 18 vjeç, tha se ajo dëshiron “të vjellë” pasi pa imazhin e babait të saj të luajtur nga një aktor i bardhë.
Sky Arts njoftoi se episodi i titulluar Elizabeth, Michael dhe Marlon, është mbështetur nga Fiennes. Por vajza e yllit të Pop-it reagoi në Twitter duke u shprehur e ofenduar nga kjo tentativë për t’i ngjarë babait të saj:
“Jam jashtëzakonisht e ofenduar nga kjo dhe jam e sigurt që kështu ndihen edhe shumë njerëz të tjerë. Sinqerisht, më vjen të vjell. Zemërohem kur shoh sesa qartësisht i qëllimshëm ishte ofendimi jo vetëm i babait tim, por edhe i kumbarës sime (Elizabeth Taylor)”, shkroi 18-vjeçarja. “Ku është respekti? Ata punuan me gjak, djersë e lot për vite të tëra për të krijuar një trashëgimi kaq të thellë. Portretizim i turpshëm”, vijoi më tej vajza e mbretit të pop-it.
Seriali mendohet se do të portretizojë jetën e vërtetë të Michael Jackson-it, Elizabeth Taylor-it dhe Marlon Brando-s, teksa udhëtojnë me makinë nga New York-u drejt Los Angeles-it, pas sulmeve terroriste të 11 shtatorit. Sakaq, në rrjetet sociale ka nisur të shpërndahet një peticion që kërkon bojkotimin e serialit televiziv. Deri më tani peticioni është nënshkruar nga mbi 21 mijë persona.
