Jemi tashmë në periudhën më magjike të vitit. Të gjithë jemi mbështjellur nën atmosferën e Krishtlindjeve, dhe asgjë nuk e shton ngrohtësinë e festave më shumë se filmat klasikë dhe të pazëvëndësueshëm. Nëse keni nevojë për një rikujtim të filmave që duhet të ndiqni ditën e sotme, jeni në vendin e duhur.
Home Alone (1990)
Ndonëse ka më shumë se 30 vite që ka dalë filmi i parë, “I vetëm në shtëpi”, padyshim është një nga filmat klasikë më të shikuar dhe më të dashur për të gjithë. Historinë e dimë përmendësh, por çdo vit ndjesitë e filmit na pasqyrojnë emocionet e fundvitit me veçantitë e saj.
Love Actually (2003)
Një komedi romantike që na bën të qeshim e të derdhim lotë njëkohësisht. Këtë vigjilje Krishtlindjesh dashuria gjendet kudo, e paparashikueshme, e pashpjegueshme. Për të qenë nën lëkurën e personazheve dhe për të larguar të gjitha shpërqendrimet përreth jush, përfshihuni brenda magjisë së “Love Actually”.
Santa Claus: The Movie(1985)
I moshuar dhe i lodhur, Santa Claus ka nevojë për ndihmë në shpërndarjen e dhuratave të tij. Një garë lind midis dy elfëve të tij më të mirë dhe pas humbjes së konkursit, elfi Patch vendos të konkurrojë Santa Claus me kompaninë e tij. Nje histori klasike që do të vijë krejt ndryshe, nëse e shoqëroni me nostalgji të fëmijërisë.
