Ndeshja Zvicër – Serbi që u finalizua me fitoren e Zvicrës në rezultatin 2-1 pas golave të shënuar nga futbollistët shqiptarë Granit Xhaka dhe Xherdan Shaqiri, ka qënë kryefjala e të gjitha mediave në mbarë botën ditët e fundit.
Ajo që u disktutua gjithandej ishte festimi i golave duke bërë simbolin e shqiponjës nga ana e Xhakës dhe Shaqirit.
Kjo gjë ka zgjuar pakënaqësi edhe tek FIFA, e cila ka hapur procedurë disiplinore ndaj futbollistëve, duke e quajtur gjestin e tyre provokim.
Pas reagimve të shumta të disa personaliteteve fushën e futbollit, gjatë ditës së sotme ka vendosur të reagojë edhe Presidenti i Federatës Shqiptare të Futbollit, Armand Duka.
“Futbolli është një lojë që ka emocione të forta dhe të bukura. Në çdo ndeshje të Botërorit shikon mënyra të ndryshme të festimit të golave. Edhe Xhaka e Shaqiri festuan në mënyrën e tyre golat e shënuar. Simboli i Shqiponjës nuk është aspak një simbol i ndaluar në asnjë vend të Botës. Nuk është simbol lufte, urrejtjeje dhe diskriminimi. Kërkesa për investigim në FIFA për mënyrën e festimit të Xhakës dhe Shaqirit është, sa qesharake aq edhe primitive. Simboli i Shqiponjës në Flamurin tonë kombëtar nuk ka pse të shqetësojë askënd!” – shkruan Duka në statusin e tij në Facebook.
