Detaje të reja janë zbardhur nga ngjarja që tronditi ditën e djeshme qytetin e Fierit, ku gruaja i vuri flakën shtëpisë. “Ballkanweb” raporton se 42-vjeçarja, e cila akuzohet për djegjen e banesës së bashkëjetuesit, ka tentuar të mbysë edhe dy vajzat e saj 6-vjeçare.
Dyshohet se shtetasja Rudina Kishta, ka tentuar t’i mbyste binjaket, në ujërat e lumit Seman në afërsi të urës së fshatit Daullas, Fier.
Më herët, shtetasi Ardian Gjika, 35 vjeç u shpreh se pas një debati me partneren ishte larguar nga shtëpia dhe kjo e fundit i kishte vënë flakën banesës. Sipas tij, ajo vuan prej disa kohësh nga depresioni.
Specialistët për Hetimin e Krimeve në Komisariatin e Policisë Fier, arrestuan në flagrancë shtetasen: Rudina Kishta, 42 vjeçe, banuese në fshatin Grecalli, Fier.
Materialet i kaluan Prokurorisë pranë Gjykarës së Rrethit Gjyqësor Fier për veprat penale “Vrasja për shkak të rrethanave familjare” e mbetur në tentativë dhe “Shkatërrimi i pronës me zjarr”, parashikuar nga Neni 79/c, 22 dhe 151/2 të Kodit Penal.
