“Festivali i Këngës” në “Radio Televizionin Shqiptar” do të vijë i tjetërsuar, me një frymë krejtësisht të re këtë fundvit. Në një konferencë për shtyp, drejtori i festivalit Martin Leka, ka konfirmuar se sopranoja Inva Mula do të mbajë postin e drejtoreshës artistike në ‘Festivalin e Këngës’. Gjithashtu pjesë e skuadrës, është edhe Sokol Marsi si producent muzikor dhe vëllezërit Pandi dhe Bledar Laço si skenarist dhe regjisor.
Në vëmendjen e drejtuesve të festivalit, janë veçanarisht të rinjtë, për të cilët do të krijohet një grup me maturantët më të mirë nga gjimnazet e Tiranës. Ata jo vetëm që ndjekim nga afër festivalin, por do të formojnë një juri ekstra, përveç asaj profesioniste, për të zgjedhur këngën më të mirë sipas tyre.
Ndër të tjera, këngët do të prezantohen për herë të parë në festival, që publiku të jetë më i vëmendshëm. Ndaj, do të hiqet dorë nga prezantimi i tyre me videoklip ditë përpara konkursit.
22 konkurentët pjesëmarrës, do të performojnë këngët në natën e parë të shoqëruar nga ‘Orkestra Simfonike’, siç ka ndodhur edhe në vitet e shkuara. Ndërkohë që në natën e dytë, që është pagëzuar si ‘Nata e Performancave’, këngëtarët do të shfaqen pa orkestër, njësoj si në ‘Eurovision’.
