Keni menduar që këtë vit t’i bëni “skip” festave? Mos u ndjeni çuditshëm, nuk jeni as të parët as të fundit.
Me rrjedhën që ka marrë jeta e gjithësecilit vitet e fundit, të ndalosh disa ditë dhe të merresh me një festë për disa mund të jetë e pamundur: ritualet, traditat, blerjet, gatimet, muzika, dekorimet, kartolinat. Disa personave “iu fillon dhimbja e kokës” vetëm duke e menduar. Nuk ka asgjë të keqe këtu.
Nuk është aspak e gabuar të mos ndihesh festiv mjaftueshëm sa personat përreth teje. Ka njerëz që shpenzimet pikërisht për festa, ku edhe çmimet rriten çmendurisht i shohin të paarsyeshme dhe kjo është “ok”.
Dikush që ditët e festave i konsideron si ditë normale nuk duhet absolutisht të ndihet në presion dhe të festojë vetëm se të tjerët e bëjnë.
Pra, duhet ta kuptojmë dhe ta respektojmë vendimin e disa personave për të mos ndjerë apo bërë diçka ekstra pikërisht për festa. Është në rregull t’i anashkaloni festimet, pavarësisht disa njerëzve që do t’ju bëjnë të ndiheni keq për vendimin tuaj.
Vlen të theksohet edhe një gjë! Fakti që ti nuk e ndjen këtë vit shpirtin e festës brenda teje nuk do të thotë që as vitin tjetër ti të mos i festosh.
Të anashkalosh festimet këtë vit nuk do të thotë t’i anashkalosh ato përgjithmonë. E keni vënë re besoj se për mirë apo për keq, festat rrotullohen çdo vit.
