FBI-ja ka publikuar foto të të dyshuarit për vrasjen me armë zjarri të aktivistit konservator 31-vjeçar Charlie Kirk, duke kërkuar ndihmë për identifikimin e tij. Dy fotot tregojnë një burrë në shkallë, të veshur me një bluzë të zezë, kapelë bejsbolli dhe syze dielli të errëta. Publikimi i fotove sugjeron që FBI-ja nuk ka qenë në gjendje ta identifikojë të dyshuarin përmes njohjes së fytyrës ose teknologjisë tjetër, pasi shefi i policisë kishte thënë më parë se fotot do të publikoheshin vetëm nëse nuk do të ishin në gjendje ta identifikonin të dyshuarin në ndonjë mënyrë tjetër.
Kreu i Departamentit të Sigurisë Publike të Utahut tha se hetuesit arritën ta gjurmonin autorin e sulmit ndërsa ai ngjitej në çatinë e një ndërtese universitare. Sipas njoftimeve, autori i sulmit mbërriti në universitet pak para mesditës. Ai u ngjit në çatinë përballë vendit ku Kirk ishte planifikuar të shfaqej. Pas sulmit vrasës me një të shtënë të vetme, e cila e goditi Kirk në qafë, personi u hodh nga çatia dhe iku drejt një lagjeje aty pranë.
“Sulmi ishte i synuar, autori nuk kishte në shënjestër askënd tjetër”
FBI-ja u shfaq qetësuese për qytetarët, me Robert Coles që vuri në dukje se sulmi ishte i shënjestruar dhe se autori nuk kishte në shënjestër askënd tjetër përveç Kirk-ut. “Dua të siguroj komunitetin lokal për rrezikun”, tha ai, duke sqaruar se nuk ka asnjë ide se ku ndodhet sot.
“Ne kemi fotografinë e tij dhe do të veprojmë shpejt për ta gjetur dhe për të marrë një përgjigje në lidhje me motivet e tij”, siguroi ai.
“Nuk mund ta besoj“, tha Presidenti i SHBA-së Donald Trump, duke folur me gazetarët pas një shërbimi përkujtimor për 11 shtatorin në Pentagon. Duke e përshkruar Charlie Kirk si një “djalë të shkëlqyer”, Trump u përgjigj se “ka plane” të kontaktojë familjen e tij.
