Masakrat që i bëhen lumit të Vjosës janë të vazhdueshme dhe jo të dënueshme ashtu siç duhet për të gjithë pa përjashtime, kompani e vogël apo e madhe. Rastet kur Ministria e Turizmit në bashkëpunim me Inspektoriatin Kombëtar të Mbrojtes së Territorit kanë vendosur gjoba ndaj sipërmarrjeve të vogla dhe kanë lënë të qeta “ato më të mëdhaja” janë të shumta.
Një rast i tillë u publikua edhe ditën e sotme në emisionin ‘Fiks Fare’.
Gazetarët e emisionit investigativ faktuan se firma Shkëlqimi 07, e cila po gërryen lumin Vjosa nuk kishte leje shfrytëzimi. Drejtuesit dhe inxhinierët e firmës nuk dispononin asnjë kopje të kësaj leje, aq më tepër vendin apo koordinatat se ku duhet të merrnin zhavorr. Mjetet e kësaj firme lëviznin ku të mundnin, pa asnjë piketim. Dhe, pasi e shfrytëzonin, nuk e rehabilitonin, duke rrezikuar jetët dhe pronat e banorëve të fshatrave afër lumit të egër.
Në një distancë prej disa kilometrash, ekskavatorët gërryenin të gjithë zonën, madje edhe në mes të lumit, duke ndryshuar disa herë rrjedhën e tij natyrale. Në gjithë distancën, ishin hapur gropa të mëdha, të cilat ende nuk janë mbyllur. Dhe, e gjitha kjo situatë, ishte vetëm 16 muaj pas përmbytjeve masive që shkaktoi Vjosa në fshatrat e Fierit dhe Vlorës, duke rrezikuar mijëra familje.
Fiksi shkoi edhe në kantierin e firmës Shkëlqimi 07, ku kamionët e shumtë shkarkonin zhavorrin buzë rrugës Levan-Tepelenë. Gazetarët pyetën drejtuesit e kantierit nëse kishin apo jo një leje shfrytëzimi dhe nëse po, në cilat koordinata apo piketime. Drejtuesit thanë se kanë një dokument, por nuk e dinin se çfarë ishte.
“Kemi një kontratë me Alb Building-un që po ndërton By Pass-in e Fierit. Lejen e shfrytëzimit e ka ai, se ne kontratën kemi që kemi bërë me të.Kemi bërë kontratë që i japim materialet dhe ai duhet të ketë bërë marrëveshje që marrim te leja e tij” thonë ata, ndërsa gazetarët shfletojnë edhe kontratën.
E njëjta situatë paraqitet edhe me sipërmarrje të tjera, të cilat vazhdojnë punën pa u ndikuar fare nga nga gjobat apo ndalesat e IKMT-së.
Gazeta Reforma e ka ndjekur këtë situatë edhe më parë dhe mund të thuhet që IKMT dhe ministria e Mjedisit lënë shumë për të dëshiruar me gjobat dhe lejet për sipërmarrjet që gërryejnë shtretërit e lumenjëve.
Në maj të këtij viti u publikua një video, ku eskavatorët e firmës ‘Gjikuria’ nxjerrin gurë nga mali dhe dëmtojnë rëndë mjedisin, por asnjë gjobë asnjë reagim nga institucionet përgjegjëse.
Dhe disa pamje nga lumi Mat, në shtratin e të cilit , kompania “Salillari” po kryen punime, tregojnë qartë gërryerjen në shtratin e këtij lumi për të marrë rërë dhe zhavor ka bërë që rrjedha e tij të devijohet, duke shkaktuar edhe eriozion në tokat bujqësore të banorëve të kësaj zone, duke sjellë sërish rrezikun e përmbytjeve në dimër, por pa asnjë reagim nga IKMT apo Ministria e Turizmit.
Ndërkohë më parë subjekte të ndryshme në Fier dhe Berat janë gjobitur nga Inspektoriati Kombëtar i Mbrojtjes së Territorit pasi kryenin veprimtari të marrjes së inerteve pa leje nështratin e lumit Seman.Sipas njoftimit të policisë, për shkeljen e kryer subjekti “Alesio 2014” shpk është gjobitur me 2 mln lekë.
IKMT dhe ministri i turizmit Blendi Klosi paralajmërojnë vazhdimisht se kontrollet do të vijojnë për penalizmin e çdo subjekti që tenton të marrë inerte pa leje në shtretërit e lumenjëve në vendin tonë apo që kryen krime mjedisore, si ndërtime pa leje, prerje të paligjshme të pyjeve, ndotje të ambientit dhe lumenjve apo zjarrvënie të qëllimshme pyjeve dhe kullotave, por me sa duket kjo vlen vetëm për sipërmarrjet e vogla.
