Artistja britanike ndodhet aktualisht në turneun e saj “Radical Optimism”, dhe koncertet në Azi nisën më 5 nëntor në Singapor. Mirëpo një fans i saj pretendon se është lënduar rëndë në një aksident piroteknik gjatë një koncerti të saj në Malajzi.
Në një postim në Reddit, fansi ndau një fotografi duke treguar pretendimet e tij mbi atë që ndodhi. Ai pyeti ndjekësit nëse mund të kompensohej për dëmin e pësuar. “Më goditi në kokë një tub metalik piroteknik gjatë koncertit të Dua Lipës në Malajzi sot”, shkroi ai.
Më pas ai rrëfeu se kishte marrë shtatë qepje dhe një skanim të trurit (CT scan). Ai pretendoi se dy persona kishin paguar faturën e tij mjekësore prej 2712 ringit malajzianë (rreth 482.10 paund apo 579.79 euro).
