Ai është prej vitesh pjesë e tregut muzikor dhe në karrierën e tij është i njohur për shumë hite, të cilat janë vlerësuar edhe me çmime. Tashmë për këngëtarin e muzikës rok, Mentor Hazirin, kishte ardhur momenti që të mbante koncertin e tij të parë recital.
Ishte vetë ai që njoftoi për projektin e fundit përmes një postimi në Instagram, ku shkruan:
“Më 28 tetor ju ftoj në koncertin tim recital në Tiranë, me një program të paparë të këngëve të mia ndër vite, bashkë me super muzikantët”.
Haziri nuk tregon se cilët janë emrat e njohur që do të ngjiten në skenën e Qendrës Kulturore, që ndodhet në Katedralen Ortodokse në kryeqytet. Nëse jeni të interesuar që të bëheni pjesë e koncertit biletat do të vihen në shitje nga nesër këtu.
Koncerti i quajtur “Shtigje Tingujsh” vjen vetëm pak muaj pasi këngëtari publikon videoklipin “When I Hear Your Name”, pas një mungese të gjatë me klipe.
Ai mori pjesë në “Këngën Magjike” të 2017-s, ku u nderua me çmimin “Zëri më i bukur mashkull”, për këngën “Plagë në zemër”.
Burimi: Instagram
