Studentja Ariela Murati që u qëllua për vdekje nga Aldison Belulaj, u përcoll dje për në banesën e fundit. Varrimi u bë në fshatin Zharrëz në Fier. Aldisoni, i cili qëlloi edhe veten e tij, është në gjendje të rëndë shëndetësore dhe po lufton me vdekjen.
Familjarët e Aldisonit kanë treguar se kanë kërkuar që të marrin pjesë në ceremoninë mortore të Arielës, por familjarët e saj nuk kanë pranuar. Ata kanë thënë se tashmë i druhen fillimit të një hasmërie mes dy familjeve.
Daja e Aldisonit në një prononcim për “News24” ka treguar se dy familjet kanë pasur marrëdhënie shumë të mira me njëra-tjetrën. Gjithashtu ai shtoi se vrasja ka qenë totalisht e paplanifikuar.
“Hedhim poshtë aludimet se vrasja ishte e planifikuar. Djali ishte tip i mbyllur dhe ne nuk dinim gjë. Shpreh keqardhje për familjen e vajzës. Ato që shkruhen në media se janë grindur nuk janë të vërteta. Familjarët e vajzës i njohim, janë njerëz të mirë. Problemet e tyre i dinë vetëm të rinjtë”, tha Agim Koroveshi, daja i Aldisonit.
