Pas veprimit të paprecedent që bëri me shfaqjen e një videoje private të nënës së 15-vjeçarit që u dhunua nga policia, për të justifikuar veprimin e vartësve të tij, kryepolici Ardi Veliu ka reaguar sërish.
Në një deklaratë zyrtare, Ardi Veliu shprehet se e gjithë deklarata e tij u keqkuptua, por vijon të ngulmojë me faktin që ishte një ilustrim i idesë që faji nuk është vetëm i policisë së shtetit.
Sikur të kishte të gjithë të drejtën e botës për të publikuar një video private dhe për ta tjetërsuar atë, Veliu thotë se po tregonte kontekstin e situatës. Nuk e dimë se çfarë lidhje kishte kjo video e marrë nga profili i Zaida Çobos, për të treguar konteksin në të cilin ndodhi dhuna ndaj adoleshentit, por Veliu thotë se është keqkuptuar.
Ai së pari duhet t’i kishte kërkuar ndjesë nënës së 15-vjeçarit që e fyeu rëndë kur i përmendi kulturën e familjes, por as këtë nuk e bëri.
Në një mbledhje virtuale të Komisionit të Sigurisë ai shfaqi një video të nënës së djalit, në vend që të kërkonte ndjesë për sjelljen e efektivëve, duke thënë shprehimisht: “Shikoni nga çfarë familje vjen ky fëmijë!”
Për këtë, nëna e 15-vjeçarit, Zaida Çobo, ish-banore e Big Brother, e cila ka qenë duke xhiruar një film në momentin që shfaqet me armë në video, tha për ABC News, se do të depozitonte një padi në prokurori për drejtorin e Përgjithshëm të Policisë.
Deklaratë e Drejtorit të Përgjithshëm të Policisë së Shtetit Ardi Veliu:
Jam i keqardhur që Policia e Shtetit bëhet rregullisht shënjestra e atyre që kurrë nuk e thanë një fjalë motivuese për të dhe sot përsëri e njëjta gjë. Ndërkohë që ne jemi organizata më rigoroze në goditjen e fenomeneve brenda vetes, mjafton që një punonjës i ynë të bëjë një gabim dhe megjithëse ndëshkohet në radhë të parë prej nesh, prapëseprapë goditja vijon ndaj Policisë së Shtetit.
Sot unë jam vënë personalisht në shënjestër dhe më vjen keq për deformimin që po i bëhet realitetit të ngjarjes për të cilën fola dhe vetë qasjes sime ndaj saj.
Së pari, fjala ime nuk mund të nxirret nga konteksti siç po bëhet.
Së dyti, kam bërë një ilustrim të idesë se nuk mundet të fajësohet gjithnjë e vetëm punonjësi i Policisë duke u kapur pas një fotoje të rastit, pa konsideruar tërë kontekstin e një situate.
Së treti, kam sqaruar se punonjësi në fjalë është pezulluar dhe ka nisur hetimi disiplinor dhe penal për të.
Së katërti, unë po komunikoja hapur me deputetët, një shqetësim që është i mbarë punonjësve tanë, për demonizimin që i bëhet figurës së Policit të Shtetit dhe nuk doja të thosha më shumë se kaq.
Por në fund dëshiroj t’u them të gjithë atyre që po e gjykojnë me ngut këtë “krim” të radhës, se nëse nuk kam arritur dot ta sqaroj si duhet atë çka kisha qëllim, kjo nuk mjafton për të më gjykuar me qëllim. Këtë detyrë e kam mbajtur dhe do ta mbaj deri në fund me nder dhe puna ka folur e do të flasë për mua dhe Policinë e Shtetit më mirë se sa fjalët tona.
Ndjesë nëse kam krijuar një keqkuptim me komentin tim dhe besoj se kushdo që do të gjykojë pa paramendim dhe pa e menduar edhe këtë si rastin e radhës për të baltosur Policinë e Shtetit, do të gjejë arsye për ta pranuar ndjesën time.
https://www.instagram.com/p/CAxeDx3A821/
