Nuk jemi dembelë, por “koha është flori”! Ndaj duam që shumë gjëra t’i arrijmë me një klikim. Prej vitesh një prekje e ekranit të celularit apo e “mouse”-it të kompjuterit na ka dërguar në një botë të pafundme virtuale.
Ndërsa shumë vite më parë disa gjëra as nuk mund të mendoheshin, sot janë të prekshme. Mjafton të kesh një celular “Android” apo “iOS” dhe mund të shkosh në qytetin tënd të preferuar, për të vizituar lokalin ku keni darkuar me miqtë, të shikosh menunë e ditës dhe të rezervosh tavolinën me pamje nga dritarja, për të cilën shpesh e ke quajtur veten me “fat”.
Kjo është risia dhe ideologjia që solli “Welcome Albania” (shkarko falas këtu), aplikacioni që po ndryshon kryekëput promovimin e Shqipërisë për të huajt, por edhe për vetë ne. Mbi të gjitha që do të na thjeshtojë jetën.
Zgjedhja e hotelit të pushimeve apo e restorantit për një darkë romantike, planifikimi për fundjavën në qytetin antik të Apolonisë ose eksplorimi i koleksionit më të ri në dyqanin e preferuar, të gjitha këto arrihen vetëm me një klikim.
Portali “Welcome Albania” ju mundëson udhëtime 360 gradë nëpër Shqipëri dhe komunikime në kohë reale me bizneset online. Për ta pasur në celularin tuaj falas, nëse keni Android e gjeni aplikacionin në Play Store (Shkarko këtu), ndërsa për iOS, aplikacioni mundësohet në APP Store (Shkarko këtu).
Ky udhëtim virtual nëpër Shqipëri, është mundësuar nga një prej partnerëve më të mëdhenj të “Google”, “Tourmake”, i cili tashmë ka mbërritur në vendin tonë për të na ofruar një mundësi promovimi jo vetëm brenda, por edhe jashtë kufijve.
Ideatori i kësaj risie, Iv Tase, në një intervistë për “Iconstyle.al”, tregoi detajet e këtij projekti:
“Është një udhëtim virtual, një eksperiencë sikur je në majë të malit apo sikur je përpara detit. Me një klikim shkon në mal, hyn në një hotel apo në një dyqan, njësoj sikur të ishe aty. Njerëzit përmes këtij aplikacioni mund të gjejnë çdo gjë të mundshme. Ky projekt po zhvillohet me ndihmën e veçantë të Agjencisë së Turizmit, e cila do të na bëjë kalendarin e punës, që deri përpara sezonit veror të kemi një shërbim shumë të qartë për turistët dhe shqiptarët, të cilët do të ikin me pushime dhe duan të shikojnë dhomat, gatimin, çmimet, kushtet, sa larg e kanë detin, do të shohin plazhin dhe çdo gjë tjetër që u intereson”.
Si ta përdorni aplikacionin
Tavolina që doni në restorant
Zgjidhni në listën e restoranteve atë që preferoni dhe hyni brenda për të parë menunë e ditës, tavolinat që janë të lira, oraret e hapjes dhe të mbylljes.
Gjithashtu mund të lexoni komentet që kanë lënë klientët për çdo biznes, në mënyrë që të krijoni një ide për vendin që do të vizitoni.
Më e rëndësishmja është që do të shikoni me sytë tuaj të gjithë ambientin përreth, arkitekturën dhe arredimin, pamjen që iu ofron apo zonën jashtë tij.
Zgjidhni orën që doni të darkoni apo drekoni dhe tavolina juaj do të jetë aty duke iu pritur.
Keni çelësat e dhomës së hotelit
Kushtet e hoteleve shpesh lënë për të dëshiruar, ndaj duhet t’i besoni vetëm syrit tuaj. Mes një numri hotelesh që janë pjesë të projektit “Welcome Albania”, mund të shikoni secilin prej tyre për nga kushtet dhe çmimet.
Pasi vendosni se cilin dëshironi, mjafton të zgjidhni orën që doni ta rezervoni, llojin e dhomës, suitë apo jo dhe për sa kohë.
Jeni të lirë të eksploroni çdo dhomë, arredimet e tyre, kushtet që ofrojnë dhe çmimet.
Festë në një klub nate
Rezervimet në klubet e natës shpesh mund të jenë të bezdisshme, por jo nëse e bëni vetë nga telefoni apo kompjuteri. Zgjidhni klubin e natës ku doni të festoni me shoqërinë ose partneren/partnerin dhe më pas shikoni detajet e rezervuara për ju: DJ-in apo këngëtarin e ftuar. Klikoni në tavolinën që do të prenotoni dhe pavarësisht sa njerëz do të ketë, askush nuk mund t’jua zërë.
Një gjë e tillë mund të bëhet edhe me rezervimin e vendit në avion, apo të një veshje që sheh në një dyqan në qendër tregtare. “Tourmake” mundëson që ti të shohësh në 3D të gjitha këto dhe me një klik dhe të marrësh shërbimin e duhur.
Por si e pritën bizneset shqiptare këtë inovacion?
“Janë mbi 250 biznese të regjistruara dhe ndërkohë ka një listë pritjeje, që në bazë të rezervimeve do të zhvillojmë pjesën e xhirimeve. Ky është një marketing për shtetin tonë dhe bizneset, për të promovuar shërbimet, vendet kulturore dhe gjithçka që ka Shqipëria”, shprehet Tase.
Idetë duan që të mbështeten dhe Iv Tase tregon sesi risia që ai dëshiroi të sillte për herë të parë në Shqipëri, tashmë është bërë reale.
“Drejtori i Agjencisë Kombëtare të Turizmit, Ardit Çollaku, dha një mbështetje absolute për ta zhvilluar më tej. Gjithashtu ministri i Turizmit dhe Mjedisit, Blendi Klosi dhe kryebashkiaku Erion Veliaj e mirëpritën idenë time dhe thanë që është një nga promovimet më të mira. Tashmë nga 7 dhjetori pas aplikacionit për versionin “Android”, u lançua edhe ai për versionin “iOS”.
