Protesta e qytetarëve kundër taksës së “Rrugës së Kombit” duket se ka bërë qeverinë të mendojë seriozisht, për ndryshimin e tarifës.
Nga dita e sotme kabineti i kryeministrit Rama ka nisur negociatat me koncesionarin e “Rrugës së Kombit” në lidhje me rishikim e tarifave për përdoruesit e banorët e zonës që preken.
“Top Channel” ka mësuar se po bisedohet për të pasur një ulje rreth 50% të tarifës, ndërkohë në Komisionin e Ekonomisë, ministri i Financave pranoi nisjen e negociatave përpara afateve të përcaktuara në kontratë. Rezultatet priten brenda 2 javësh.
“Kontrata, në logjikën e saj, i referohet negociatës pasi të dalin statistikat. Kryeministri ka kërkuar që kjo negociatë të bëhet përpara se të dalin statistikat për të përfshirë si një paketë sociale solidariteti”, tha ministri Ahmetaj.
Erion Braçe kërkoi pikërisht që të ketë lehtësira për banorët që preken nga vendosja e tarifave për kalimin në Rrugën e Kombit.
“Një kategori e caktuar, qoftë përdoruesish atje, qytetarë, banorë të zonës, duhet të përjashtohen nga pagesa e asaj tarife. Do të doja të dija, nëse ju po i mëshoni kësaj pike në negociatat që ju po bëni me koncesionarin”, tha Braçe.
Në negociata me koncesionarin po bisedohet edhe në lidhje me reduktimin e tarifimit për mjetet e transportit të qytetarëve.
Burimi: TCH
