“Facebook” ka rënë pre e një sulmi kundër rrjetit social dhe rreth 50 milionë përdoruesve iu është cënuar privatësia. Drejtuesit e kompanisë bëjnë thirrje se mbi 90 milionë të tjera duhen të ndryshojnë fjalëkalimet për arsye sigurie.
Sipas Kreut të Sigurisë së “Facebook”, Guy Rosen sulmuesit ishin në gjendje të shfrytëzonin një cenueshmëri në një tipar të njohur si “View As” (Shikoni si) për të fituar kontrollin e llogarive të njerëzve.
“Gabimi është rregulluar. Sapo kemi filluar hetimet tona, duhet ende të përcaktojmë nëse këto llogari janë keqpërdorur apo çfarë informacioni është marrë. Ne gjithashtu nuk e dimë kush është prapa këtyre sulmeve, apo ku janë bazat e tyre. Privatësia dhe siguria e njerëzve janë tepër të rëndësishme dhe na vjen keq që kjo ndodhi”- ka bërë me dije kreu i sigurisë së firmës, Guy Rosen.
Përdoruesit “Facebook”, të cilët u prekën nga sulmi janë detyruar që të rihapin llogaritë këtë të premte.
