Në një kohë kur virusi po rrit gjithnjë e më shumë rrezikun për jetën e qytetarëve, duket se kjo nuk është një arsye për ndalimin e tubimeve. Bota po shqetësohet për variantin e ri të Covid-19, Omicron, shumë vende po mbyllen sërish, mirëpo në Shqipëri hidhet valle!
Madje, zyrtarët e vendit tonë i mbështesin këto grumbullime nëpërmjet postimeve të tyre në rrjetet sociale.
Prej ditësh kryebashkiaku i Tiranës, Erion Veliaj, kishte paralajmëruar për eventin që do të mbahej në Tiranë me rastin e ‘Natës së Bardhë’.
Ky event u mbajt mbrëmjen e sotme, në kundërshtim me të gjitha rregullat anti-Covid të vendosura nga Komiteti Teknik i Ekspertëve dhe duke vendosur edhe njëherë në rrezik jetën e qytetarëve.
“Penda 2021” u zhvillua në gjashtë vende të ndryshme brenda Tiranës, duke mbledhur njerëz jashtë kapacitetit të lejuar për tubimet, siç mund ta shihni edhe vetë në pamjet e mëposhtme:
Siç shihet nga pamjet, numri i pjesëmarrësve në këtë event të zhvilluar është mjaft i lartë në një kohë që nuk lejohen grumbullime me më shumë se 50 persona në ambientet e jashtme.
“Lejimi i konferencave, eventeve, trajnimeve, seminareve, takimeve etj… në rast të përmbushjes së kritereve për hapësirat rekomandohet të zhvillohen:
Zhvillimi i konferencave / eventeve aty ku është e mundur në sallat që mund të lejojnë distancimin fizik ose të zhvillohen në ambjente të hapur deri në 50 persona.
Rekomandohet që ulja e pjesmarresve të jete e tillë që të respektojë masat e aprovuar nga MSHMS”, thuhet në protokollin e IShP-së.
Edhe njëherë, në vendin tonë u tregua se këto evente kanë më shumë rëndësi se jeta e vetë qytetarëve.
