Eurovision Song Contest 2027 do të mbahet në Burgas të Bullgarisë, qyteti bregdetar që është zgjedhur zyrtarisht për të pritur edicionin e 71-të të konkursit më të madh muzikor në Europë.
Bullgaria fitoi të drejtën për organizimin e Eurovisionit pasi Dara triumfoi në edicionin e vitit 2026 në Vjenë me këngën “Bangaranga”, duke i dhuruar vendit fitoren e parë në historinë e tij në këtë kompeticion.
Unioni Evropian i Transmetuesve, EBU, dhe Televizioni Kombëtar Bullgar, BNT, konfirmuan se Burgasi do të jetë qyteti pritës, ndërsa spektakli do të zhvillohet në Arena Burgas, një nga impiantet më të reja sportive dhe argëtuese të vendit, e hapur në vitin 2023.
Përzgjedhja erdhi pas një gare mes katër qyteteve bullgare. Burgasi, Sofja, Varna dhe Plovdivi paraqitën kandidaturat e tyre, ndërsa në fazën finale mbetën Burgasi dhe Sofja.
Sipas EBU-së, Burgasi fitoi falë një propozimi të fortë që kombinonte kapacitetet teknike të arenës, mundësitë e akomodimit, transportin dhe lidhjet ndërkombëtare.
Drejtori i Eurovision Song Contest, Martin Green, e cilësoi Burgasin si një qytet me identitet të fortë kulturor dhe muzikor, duke theksuar se organizatorët synojnë që Eurovisioni i parë i zhvilluar ndonjëherë në Bullgari të ketë një karakter të dallueshëm vendas, por pa humbur frymën e festivalit.
“Burgasi sjell diçka vërtet të veçantë në Eurovision Song Contest. Është një qytet i gjallë dhe mikpritës në brigjet e Detit të Zi, me ambicien, infrastrukturën dhe pasionin e nevojshëm për të mirëpritur familjen e Eurovisionit”, u shpreh ai.
Edhe drejtuesit e BNT-së kanë deklaruar se Bullgaria synon të prezantojë përpara miliona shikuesve kulturën, mikpritjen dhe profesionalizmin e saj, ndërsa puna për organizimin e spektaklit ka hyrë tashmë në një fazë intensive.
Eurovision Song Contest 2027 do të zhvillohet nga 11 deri më 15 maj. Gjysmëfinalja e parë do të mbahet më 11 maj, e dyta më 13 maj, ndërsa finalja e madhe është planifikuar për të shtunën, 15 maj.
Për Burgasin, përzgjedhja përfaqëson një moment historik, ndërsa për Bullgarinë Eurovision 2027 do të jetë hera e parë që vendi organizon konkursin.
