Televizionit më të madh informativ në Shqipëri i është bashkuar së fundmi edhe gazetari i njohur Sokol Balla.
Gazetari Balla u prezantua zyrtarisht nga Presidenti i “Hysenbelliu Group”, z.Irfan Hysenebelliu i cili pasi e njohu me stafin dhe infrastrukturën e televizionit, u shpreh i bindur se bordi drejtues ka marrë vendimin e duhur për të bërë pjesë te ekipit gazetarin Sokol Balla, i cili do të drejtojë emisionin kryesor politik.
“Ne “News24” kemi marrë një nga drejtuesit më me emër dhe një drejtues me rëndësi të dy televizioneve kombëtare. Kam besim që stafi drejtues dhe unë kemi bërë zgjedhjen më të mirë me Sokol Ballën, i cili do të ketë drejtimin e emisionit politik”, tha Irfan Hysenbelliu.
Sokol Balla do të drejtojë emisionin më të rëndësishëm politik në këtë televizion, i cili do të transmetohet katër ditë në javë, përgjatë orës 21:00-23:00.
Në një njoftim të tij Sokol Balla tregoi se pritet që emisioni i tij në këtë televizion të arrijë suksese të mëdha.
“Për mua është një farë rikthimi në “News24: pas shumë vitesh por tashmë televizon me dimension dhe parametra të reja të dimensioneve kombëtare dhe mbarëkombëtare, burim informacioni për shumicën e shqiptarëve dhe televizion që konkurron denjësisht me tv gjeneraliste në treg, besoj që “Real Story” do të jetë në vazhdën e emisioneve të mëparshme të suksesshme në këtë tv, besoj që do ta cojmë një hap më tutje”, tha Sokol Balla.
Ardhja e Sokol Ballës në këtë televizion vjen pas dy largimeve të bujshme të, Adi Krastës dhe Ylli Rakipit, të cilët thuhet se u larguan për motive politike.
Vitin e kaluar “Real Story” u transmetua në “Vizion Plus”.
